Thursday, October 19, 2017

ഒരു ഇന്ത്യൻ ഫാസിസ്റ്റ് പ്രണയഗാഥ

സഫറിങ്ങ്
അവരാദ്യം എന്റെ കീശയിൽ കയ്യിട്ടു..
വിയർപ്പുണങ്ങാത്ത വിശപ്പിന്റെ വില
ചോദിക്കാതെ പറയാതെ ഏടുത്തോണ്ട് പോയി..
രാജ്യസ്നേഹിയായ ഞാൻ രാജ്യനന്മയെക്കരുതി ഒന്നും മിണ്ടീലാ...
ഒന്നു രണ്ട് ട്രോൾസ് ഷെയർ ചെയ്ത് എന്റെ വിഷമം തീത്തു...
പിന്നേം സഫറിങ്ങ്
ബാങ്ക് സമ്പാദ്യത്തിൽ ചോർച്ച തോന്നി..
കമ്മീഷൻ..സർവീസ് ചാർജ്..
രാജ്യ പുനർനിർമാണത്തിനു വേണ്ടി എടുക്കുന്നതായിരിക്കാം...
അതും ഞാനങ്ങു സഹിച്ചു.രാജ്യം പുരോഗമിക്കട്ടെ.. .
ലിഞ്ചിങ്ങ്
ഒരു ദിവസം കുറേപ്പേർ വന്നെന്റെ അടുക്കളയിക്കേറി ഫ്രിഡ്ജ് തുറന്ന് മണം പിടിച്ചു...
ഫോറസ്റ്റ്കാരാന്നോ..വെടിയിറച്ചിയല്ല..ഇത് വേടിച്ചയിറച്ചിയാ എന്നു പറഞ്ഞീട്ടും കേൾക്കാതെ..
ഇറച്ചിപ്പരുവമാക്കി കളഞ്ഞു..
ഗോമാതാവേ ക്ഷമി..ക്ഷമി.. .
ബ്ലെസിംങ്ങ്
അടുക്കള വഴി ബെഡ് റൂമില്ക്കേറി.....ടിപ്സ്..ടിപ്സ്..ടിപ്സ്..
നം.1. വിത്തിട്ട് കഴിഞ്ഞാൻ വിളവെടുക്കാൻ നേരം വന്നാ മതി.
നം.2. അതു വരെ സനാതന ധർമ്മം സീഡിയിലിട്ട് കേൾപ്പിച്ചു കൊണ്ടിരിക്കുക..നല്ല വിളവു കിട്ടും..
നം.3. ബാബ, ബാപ്പു, രാമരഹീം മുതലായവരുടെ അനുഗ്രഹങ്ങൾ സ്വീകരിക്കുന്നത് ഉത്തമം..
വേണം എനിക്കു വേണം ആർഷ ഭാരത സംസ്കാരത്തിന്റെ
മണവും ഗുണവുമുള്ള പരമ്പരയെ. .
പുഷിങ്ങ്
പിന്നെ വന്നത് ഒരു സുനാമിയാ..കണ്ണൻ താനാ എന്നാ പറഞ്ഞെ..
കണ്ണൻ പറഞ്ഞാ പറഞ്ഞതാ...അതോണ്ട്
വടക്കുള്ള പാവങ്ങൾ വെളിക്കിരിക്കാതിരിക്കാൻ 
എന്റെ സംഭാവന ഇപ്പോ എന്നും പെട്രോൾ പമ്പിൽ കൊടുക്കുന്നുണ്ട്.
ഗോമാതാ ഫ്രൈ വെക്കാൻ പറ്റാത്തോണ്ട് 
കുക്കിംഗ് ഗ്യാസിന്റെ സബ്സിഡി ഇല്ലാതായത് എനിക്കൊരു വിഷയവും അല്ല..
സ്റ്റാർട്ടപ്പിങ്ങ്
പുരാണേതിഹാസങ്ങൾ മിത്തല്ല..നമ്മടെ മുത്താണ്..
തൊട്ടു പോകരുത്..തുറന്നു നോക്കരുത്..
പറഞ്ഞിട്ട് കേൾക്കാതിരുന്നാ എന്താ ചെയ്ക..
ഇത്രേം പ്രായമായില്ലേ..കുട്ടികളാരുന്നേൽ ആരമിച്ച് സാവധാനത്തിൽ 
പറഞ്ഞ് മനസിലാക്കാമാരുന്നു..
കിഴവന്മാരെക്കൊണ്ട് രാജ്യത്തിനെന്ത് നേട്ടം...
കിഴവൻസ് ആന്റ് കിഴവീസ് - ഗൺ ഡൗൺ..
യുവാക്കൾ..സ്റ്റാർട്ട് അപ്പ്..സ്റ്റാർട്ട് അപ്പ്... 
റ്റെർമിനേറ്റിങ്ങ്
ബുള്ളറ്റ് ട്രെയിനിന്റെ സ്പീഡിൽ ഒരു യാത്ര വന്നു..
കൈ വെട്ടാനുണ്ടോന്നു ചോദിച്ചു..
മറ്റേക്കൈ ഉണ്ടെന്നു പറഞ്ഞപ്പോ അവരതേ സ്പീഡിൽ പോയി.
ഗൗജിങ്ങ്
കണ്ണുകൾക്ക് വേണ്ടിയാ ഇന്നലെ വന്നത്..ഐ സ്പെഷ്യലിസ്റ്റ് ഡോ. സരോജിനി.
പരിശോധന കഴിഞ്ഞ് മാഡം പറഞ്ഞു..
നീ രാജ്യസ്നേഹിയാണല്ലേ ..നിന്റെ കണ്ണുകൾ പണ്ടേ മാറിക്കഴിഞ്ഞിരിക്കുന്നു.
എന്നാൽ, പളപളപ്പിലും പുകമറയിലും ആരവങ്ങളിലും ആക്രോശങ്ങളിലും ആഘോഷങ്ങളിലും യോഗയിലും സ്വച്ഛതയിലും  ഫാസിസതെ തിരിച്ചറിയാൻ ചുവപ്പ് രാശി പടർന്ന അവരുടെ കണ്ണുകൾക്കാവും.. ആ കണ്ണുകൾ ചൂഴ്ന്നെടുക്കാനുള്ള യാത്രയിലാണു ഞങ്ങൾ....

യീൽഡിങ്ങ് ആൻഡ് ദെൻ ലവിങ്ങ്
ഞാൻ വിധേയനായിക്കഴിഞ്ഞു..
ഇനി ഏമാനില്ലാതെ ഞാനില്ല..എറാൻ മൂളാതെ പറ്റില്ല..
ഞാനും അവരോടൊപ്പം പോകുന്നു.
ഹെയ്ൽ ഹിറ്റ്ലർ..അയ്യോ മാറിപ്പോയി..ഭാരതമാതാക്കീജയ്..



Tuesday, September 12, 2017

ബ്ലൂകൃഷ്ണ ജയന്തി ആശംസകൾ

കൃഷ്ണനും രാമനും ശിവനും കറുമ്പൻമാരായിരുന്നു..
കറുപ്പ് അവർണ്ണമായതിനാൽ അവരുടെ കറുപ്പിനെ നീലയാക്കി സവർണരാക്കി മാറ്റി തങ്ങളോടൊപ്പം നിർത്തുകയായിരുന്നു ഹിന്ദുമതത്തിലെ വരേണ്യവർഗം...
വാൽമീകി ജാതിയിൽപ്പെട്ട( തോട്ടിപ്പണിക്കാർ) രത്നാകരൻ ഒരു ഗംഭീര കവിതയെഴുതിയെതിയപ്പോൾ അവനെ മഹർഷിയാക്കി കൂടെ നിർത്തിയ പോലെ...
മുക്കുവപ്പെണ്ണിനു കള്ളസന്യാസി(അന്നത്തെ ഒരു ആൾദൈവം) കൊടുത്ത ‘അനുഗ്രഹ’ത്തിൽ പിറന്നവൻ ഒരു യുദ്ധനോവൽ എഴുതി ..സംഗതി കൊള്ളാമെന്ന് കണ്ട് അവനെ വേദവ്യാസനാക്കി കൂടെ കൂട്ടി…
കൃഷ്ണനെക്കൊണ്ട് കുളിക്കടവിലെ തുണിയെടുപ്പിച്ചും...
കൗരവരെക്കൊണ്ട് പാഞ്ചാലിയുടെ തുണിയഴിപ്പിച്ചും...
സീതയെ ജീവനോടെ കുഴിച്ചു മൂടിയും..
സതിയെ പച്ചയ്ക്ക് ചുട്ടും...
ഏകലവ്യന്റെ വിരലറുത്തും....
അവർ കഥകൾ മാറ്റിയെഴുതിച്ചു...

വരേണ്യതയുടെ കൂടെക്കൂട്ടലുകളും കൂട്ടിക്കൊടുപ്പുകളും കൊള്ളയും കൊലയും കൊള്ളിവയ്പ്പും...
നമോകലികാലത്തിലും അനുസ്യൂതം തുടരുന്നു..!!
ഭാരതമാതാവേ കീ ചെയ്ൻ...
അപ്പൊ പറയാൻ വന്ന കാര്യം മറന്നു..
എല്ലാ വെളുമ്പന്മാർക്കും ‘ബ്ലൂ’കൃഷ്ണ ജയന്തി ആശംസകൾ..

Wednesday, August 16, 2017

പുതുവൽസരാശംസകൾ


കേരളീയരുടെ പുതുവർഷദിനത്തിൽ ലോകമെമ്പാടുമുള്ള മലയാളികൾക്കും അമലയാളികൾക്കും സമാധാനം ആശംസിക്കുന്നു. ഇന്റ്യയും ചൈനയും തങ്ങളുടേതെന്നവകാശപ്പെടുന്ന ആരുടേതുമല്ലാത്ത ഇടങ്ങൾ നിരപരാധികളുടെ കൂട്ടക്കുരുതിയിലേക്കു നയിക്കാതിരിക്കട്ടെ. ഞാനോ നീയോ എന്ന അമേരിക്കൻ - കൊറിയൻ അഹന്താ മൽസരങ്ങളും മുളയിലേ പട്ടുപോകട്ടെ. കരഞ്ഞു ജനിക്കുന്ന കുട്ടികൾ ചിരിച്ചു മാത്രം വളരട്ടെ.



Wednesday, August 9, 2017

രാധേയൻ

നിഷേധിക്കപ്പെട്ടതും നൽകപ്പെട്ടതുമായ സിംഹാസങ്ങൾക്കിടയിൽ ജീവിക്കുന്നവനാണ്‌ കർണൻ..
ചിരഞ്ജീവിയാണവൻ...

ജനിച്ച ജാതിയല്ല വളത്തിയ  ജാതിയാണ്‌ തന്റെ സ്വത്വമെന്നും
ജനിച്ച നാടല്ല വളർത്തിയ നാടാണെന്റെ മാതൃരാജ്യമെന്നും
പെറ്റെറിഞ്ഞതല്ലമ്മ  പോറ്റിവളർത്തിയതാണെന്നും
ഉറക്കെപ്രഖ്യാപിക്കേണ്ട കാലമാണിത്....
അതിർത്തിരേഖകൾ മാഞ്ഞുപോകേണ്ടത് മനസ്സിൽ നിന്നാണ്‌..
അഭിനവ കർണന്മാർ അതിജീവനത്തിന്റെ കുരുക്ഷേത്രങ്ങളിൽ ജീവിത രഥചക്രം പുതഞ്ഞു
നിസ്സഹായരായി പോരാട്ടമവസാനിപ്പിക്കുമ്പോൾ....
അഴുക്കെടുക്കുന്നവൻ അഴുക്കായി മാറ്റപ്പെടുമ്പോൾ..
ഞാൻ രാധേയനാണ്‌ കൗന്തേയനല്ലെന്ന കർണന്റെ വാക്കുകൾ
മുദ്രാവക്യമായി മുഴങ്ങിയാൽ അത്ഭുതപ്പെടാനില്ല...

നിഷേധകയ്പ്പുനീ കുടിച്ച് മരിച്ചവരും മരിച്ച് ജീവിക്കുന്നവരുമായ എല്ലാ സൂതപുത്രന്മാരും നിന്നെ നമിക്കുന്നു

Monday, December 12, 2016

മാമ്പഴം



അവൻ അവളെ ഭ്രാന്തീന്നു വിളിച്ചു...
അവൾ അവനെ..
പൊട്ടാ വട്ടാ
കള്ളാ കുള്ളാ പോക്കിരീ തെമ്മാടീ...
അവൻ വീണ്ടും..
മുഴുഭ്രാന്തീന്ന്.....
അവൾ അവനെ കൊഞ്ഞനം കുത്തി....
അവൻ മൂക്കു പിഴിഞ്ഞ് അവൾടെ പാവാടേൽ തേച്ചു..
അവൻ മാമ്പഴം പറിച്ചു..
അവൾടെ വായ് നിറഞ്ഞു....
അവൻ കടിച്ചു തിന്നു...
അവൾടെ കണ്ണു നിറഞ്ഞു...
അവൾ ഓടിപ്പോയി..
അവന്റെ കീശേൽ അതിനേക്കാൾ വലുതവൾക്കായ്..
അവളെ കണ്ടില്ല..അവൾ വന്നില്ല...
കാക്കയും കുരുവിയും അണ്ണാറക്കണ്ണനും ചോദിച്ചു..
അവൻ കൊടുത്തില്ല...
ലവനും ലവളും ലതിന്റെ ലപ്പുറത്തുള്ളവരും ചോദിച്ചു..
അവൻ കൊടുത്തില്ല...

ദേ.....അങ്ങു  ദൂരെ ...
ആ മാഞ്ചുവട്ടിൽ അവനോടൊപ്പം അവരും ലവരും അവളെ കാത്തിരിക്കുന്നു...






ഡീ മോഡിറ്റൈസേഷൻ!!

നയപൈസയില്ലാ കയ്യിലൊരു നയാപൈസയില്ലാ....നഞ്ചു വാങ്ങിത്തിന്നാൻ പോലും നയാപൈസയില്ല....


കഴുതകൾക്ക് രാജാവായി കുതിരയെ പ്രതീക്ഷിക്കാമോ...

മാനനീയ ശ്രീ ശ്രീ പൂജ്യ മഹാരാജാവിന്റെ അടുത്ത വിളംബരം വന്നിട്ടു വേണം തൂങ്ങിച്ചാവണോ..മുങ്ങിച്ചാകണോ എന്നൊക്കെ തീരുമാനിക്കാൻ....

ആരൊക്കെ എന്തൊക്കെ പറഞ്ഞാലും  ഭാരതമാതാവു കീകീ ജയ്...


Sunday, August 28, 2016

ഹാപ്പീ ഓണം

കാണം വിറ്റും നാണം വിറ്റും മാനം വിറ്റും മര്യാദ വിറ്റും മരുന്നു വിറ്റും മരണം വിറ്റും നമ്മൾ ആഘോഷിക്കുന്ന കൊല(മല)യാളികളുടെ സാർവദേശീയ ആഢംബര പര പമ്പരത്ത മഹാമഹമാണ്‌ ഓണം.